ՁԱՈ ծրագրի օժանդակությամբ Արտաշատում ատամնաբուժական կլինիկա է բացվել
< 1 min readԱՐՏԱՇԱՏ, Հայաստան — 2018 թ.-ի հունիսի 2-ին Արտաշատում տեղի ունեցավ ատամնաբուժական կլինիկայի բացման արարողություն, որին մասնակցեց Հայաստանի ամերիկյան համալսարանի (ՀԱՀ) պատվավոր նախագահ, «Ձեռներեցներ առողջապահության ոլորտում» (ՁԱՈ) ծրագրի ղեկավար, դոկտոր, պրոֆեսոր Հարություն Արմենյանը:
Կլինիկան ՁԱՈ ծրագրի օժանդակությամբ հիմնադրված առաջին ծառայությունն է: ՁԱՈ ծրագիրը սկիզբ է առել ՀԱՀ Թրփանճեան Հանրային առողջապահության ֆակուլտետի կողմից՝ «Թրփանճեան գյուղական համայնքների զարգացման» (ԹԳՀԶ) ծրագրի հետ համագործակցության արդյունքում: Այն նպատակ ունի օգնել առողջապահության ոլորտի ձեռներեցներին՝ հիմնել կամ ընդլայնել իրենց մասնավոր գործունեությունը՝ այդպիսով բարձրացնելով որակյալ ծառայությունների հասանելիությունը Հայաստանի, Արցախի և Ջավախքի մարզային փոքր քաղաքներում և գյուղական համայնքներում՝ կիրառելով ժամանակակից տեխնոլոգիաներ և նորարարական մոտեցումներ: Արտաշատի ատամնաբուժական կլինիկայի սեփականատեր Մարատ Սարգսյանը դիմել էր ՁԱՈ ծրագրին՝ նպատակ ունենալով նախաձեռնել մասնավոր ատամնաբուժական ծառայություն: Հաջողությամբ անցնելով ծրագրի կողմից առաջարկվող դասընթացները, որոնք փոխանցեցին ձեռնարկատիրական և բուժօգնության որակի բարելավման վերաբերյալ հմտություններ՝ նա բիզնեսի և որակի ապահովման իր ծրագրերը ներկայացրեց փորձագետների խորհրդին: Հաստատման մի քանի փուլ անցնելուց հետո բժիշկ Սարգսյանն ստացավ ֆինանսական աջակցություն, ինչի արդյունքում ձեռք բերեց սարքավորումներ՝ իր ատամնաբուժական կլինիկայի համար:
Սարգսյանի կողմից մշակված որակի ապահովման ծրագիրը երաշխավորում է կլինիկայի համապատասխանությունը միջազգայնորեն ճանաչված չափանիշներին: ՁԱՈ ծրագրի անձնակազմը շարունակելու է աշխատել բժիշկ Սարգսյանի հետ՝ տրամադրելով խորհրդատվություն՝ կլինիկայի հետագա բարեհաջող գործունեությունն ապահովելու համար:
Կլինիկայի բացման առթիվ դոկտոր Արմենյանը նշել է, որ սա առաջինն է այն բազմաթիվ առողջապահական նախաձեռնություններից, որոնք ստեղծվելու են ՁԱՈ ծրագրի շրջանակներում: Որակյալ առողջապահության հասանելիությունը հնարավորություն է ընձեռում վերափոխել առողջապահական ծառայությունների ոլորտը Հայաստանի գյուղական համայնքներում և մարզային փոքր քաղաքներում:
ՀԱՀ Թրփանճեան հանրային առողջապահության ֆակուլտետն ակտիվ գործունեություն է ծավալում Հայաստանում և տարածաշրջանում բնակչության առողջության և առողջապահական ծառայությունների բարելավման ուղղությամբ՝ միջգիտակարգային կրթական ծրագրերի տրամադրման և առողջապահության ոլորտում մասնագետներ կրթելու միջոցով, ովքեր հետագայում դառնում են առաջատար մասնագետներ՝ հանրային առողջապահության, առողջապահական ծառայությունների հետազոտման և գնահատման, առողջապահականծառայությունների տրամադրման և կառավարման ոլորտներում:
